Enmarcado na celebración en 2011 do Ano da Música, Galicia Importa ofrece unha programación regular con grupos ou artistas que nunca visitaron Galicia ou que pola súa traxectoria, estilo ou relevancia, merezan ser presentados ao público galego en actuacións únicas e formatos especiais.

Os quince anos de carreira e nove álbums contemplan a este músico escandinavo, que ten sabido crear un son propio, mesturando con mestría o seu estilo de crooner e a música electrónica. Jay Jay Johanson non se considera estritamente un cantante, porque se dedica a contar historias emocionais, a plasmar a melancolía cunha sensibilidade nova. Contemporáneo e clásico á vez, nos seus concertos resulta tan heterodoxo como natural. Rompe a imaxe que el mesmo creou para dar renda solta a unha paixón especial, a de crer que a música é o mellor vehículo para contar estados de ánimos.

Considerado o sueco da voz suxestiva, Jay Jay Johanson, interpreta as súas pezas como un deses antigos cantantes románticos cunha sensibilidade contemporánea e sobre un cultivado formato musical dixital. Mestura a textura do trip-hop con outros formatos, cunha personalidade desconcertante que plasma nos seus discos. Como un Frank Sinatra da era electrónica. Para os que non o coñecen, Jay-Jay derrocha carisma por todos os poros da súa pel. Posuidor dunha sensibilidade pouco habitual, a miúdo comparóuselle con nomes ilustres como Rufus Wainwright ou Antony & the Johnsons.