Seis organizacións e o movemento das 'Indignadas' impulsan mañá

en Compostela un mercadiño Para consumir sen nos consumir

Os colectivos ADEGA, Amarante, Equisol, a Gentalha do Pichel, Panxea e

Verdegaia levan este xoves á Praza do Toural ideas prácticas para un

consumo máis consciente coa colaboración das Asembleias do 15-M

Ás portas do Nadal e para respostar á chamada ao consumo e aos

excesos propios destas datas, seis organizacións ecoloxistas e sociais

veñen de xuntar os seus esforzos para promover en Compostela un

mercadiño alternativo onde se amosará outro xeito de facer a compra.

Baixo o lema Para consumir sen nos consumir e contando co apoio do

movemento asembleario do 15-M, as entidades ecoloxistas ADEGA e

Verdegaia, o grupo de activistas a prol da lingua e da cultura do país que

dan vida á Gentalha do Pichel e tres organización que promoven o

consumo consciente en Compostela –Panxea, Amarante e Equisol–

trasladarán a quen se achegue o xoves día 22 á Praza do Toural toda a

información precisa sobre o enorme impacto social e ecolóxico dunha

acción que executan todas as persoas e máis dunha vez no día:

consumir. Os postos abrirán ao redor das 11 da mañá, e as actividade

prolongaranse até a última hora do serán.

Mais para combater o modelo económico vixente non abonda coa

información. Hai que mudar os hábitos de consumo. Por iso, do que se

trata é de habilitar un espazo de intercambio non capitalista,

sensibilizando no consumo consciente e denunciando ao mesmo tempo

un sistema asentado sobre o consumismo e o esbanxamento innecesario

de recursos naturais, tanto no Norte coma no Sur. Se só o 1% das cousas

que mercamos fica nas nosas casas transcorridos seis meses, non ten

xeito seguir alimentando esta maneira de consumir.

OBRADOIROS DE XABRÓN E XOGUETES, E COMERCIO XUSTO

Ademais da posibilidade de mercar comida sabendo de onde vén e como

foi elaborada, haberá tamén obradoiros para aprender a facer nós

mesmas os produtos que consumimos, sen recorrer á compra. Así, as

máis pequenas da casa saberán como darlle unha segunda vida aos

envases que van parar ao lixo e deseñarán os seus xoguetes; e todas

coñeceremos un pouco máis sobre o troco, un sistema de mercado onde

o que se ten en conta é o valor das cousas e non o seu prezo en moeda,

partindo da premisa de que as inxustizas que nacen do sistema capitalista

só se combaten promovendo outro xeito de consumir que respecte as

persoas e o medio ambiente. Haberá obradoiros tamén para as adultas,

coma un de xabrón ecolóxico ao xeito das nosas avoas, reutilizando

aceite usado misturado con esencias e sosa.

Mais quen se achegue até este mercadiño tamén coñecerá o labor de

movementos alternativos coma as cooperativas vinculadas co comercio

xusto ou a agroecoloxía. A posta en valor do traballo das produtoras, a

defensa do comercio local, a loita polo dereito á soberanía alimentar dos

pobos e contra as relacións inxustas que fan as grandes multinacionais

son algúns dos piares que sosteñen o comercio solidario. Así, nos postos

de Equisol, Amarante e Panxea saberemos de onde vén o café do noso

almorzo e canto custa producilo, que son os 'alimentos quilométricos' e a

súa pegada ecolóxica, en que condicións traballan as persoas que cosen

a nosa roupa nos países do Sur ou o papel das mulleres nas cooperativas

que venden os seus excedentes no mercado xusto.