Unha espiña de toxo atópase cunha folla de carballo moi presumida e intenta, sen éxito, ser a súa amiga. Así comeza A Berenguela, un relato escrito por Manuel María e convertido agora nunha orixinal opereta para nenos e maiores. Con música composta por Nani García e interpretada polo cuarteto de clarinetes Xerión, e un texto adaptado e lido pola actriz María Inés Cuadrado, A Berenguela é unha proposta orixinal, innovadora e 100% galega na que o relato discorre grazas á forza da narración oral, destacando a capacidade expresiva da música como código de linguaxe que comunica emocións.

Un clásico da literatura infantil galega que se representará este sábado no Teatro Principal de Compostela a partir das 19:30 e con prezos populares para a entrada: 6 euros para adultos e só 3 euros para nenos.

Nani García é un sonado compositor e produtor coruñés recoñecido internacionalmente e un dos autores de bandas sonoras máis prolíficos do país. Compositor da música de nove longametraxes --entre elas a dos filmes Arrugas (película de animación que vén de ser premiada nos Goya) e De Profundis--, series de televisión estatais, 13 obras de teatro e máis de 60 publicacións entre CDs, obras de teatro, danza, vídeo exposicións, etc. A súa longa traxectoria levouno a colaborar con músicos da talla de Dulce Pontes, Paolo Fresu, Joao Afonso, Jorge Pardo, Alfonso Morán, Michael McGoldrick, Pablo Milanés, Karen Mathenson, Baldo Martínez, Roberto Somoza, Ainhoa Arteta, Amacio Prada, Manecas Costa, Luar na Lubre, Tom Guillion ou Kenny Wheeler, entre outros.

María Inés Cuadrado é licenciada en Artes Escénicas. Participou como actriz en produccións audiovisuais como As Viaxeiras da Lúa, Chapapote ou Rías Baixas, entre outras; en Palabras que trae o vento, Non se che faga tarde, La música de las palabras e en programas de radio de Radio Oleiros e Cadena SER Santiago. Ademais, vén de estrear o seu primeiro texto teatral dirixido por ela mesma, Malos entendidos. Baixo a agrupación Axente das palabras, Cuadrado adícase ao relativo á expresión oral e á comunicación, propoñendo actividades en colexios, museos, institutos, bibliotecas, etc. así como formación profesional e empresarial.

Xerión é un cuarteto de clarinetes integrado por Juan Pérez, Rafa Espido, Suso Sánchez e Xocas Meijide, todos eles profesores de conservatorio e integrantes da Banda Municipal de Música de A Coruña. O Cuarteto Xerión xa é todo un referente na escena clarinetística galega, e os seus integrantes poden presumir de contar con recoñecementos internacionais como o premio de clarinete baixo Henri Selmer outorgado a Xocas Meijide, clarinetista lalinense que vén de publicar un disco dobre de música contemporánea, Doubles.