Galeano está a presentar no noso país a súa nova obra e ó longo do mes de maio, en cidades coma Barcelona, Córdoba, Granada, Sevilla, Bilbao ou Madrid e o vindeiro mércores, 13 de xuño, estará en Ourense, ás 19.30h., no Auditorio Municipal (rúa da Canle, 2), para compartir con todos aqueles que desexen asistir, os segredos de “Los hijos de los días” onde, a xeito de calendario, atribúe unha nova historia a cada día.

A entrada é libre e gratuíta para todos aqueles interesados en asistir, ata completar aforo, e poder compartir cun dos autores máis destacados da literatura latinoamericana, unha charla sobre o seu traballo e a importancia para él de darlle voz a aqueles que o teñen menos doado.

Eduardo Galeano, periodista e escritor uruguaio abarca, neste novo texto, os días do ano, dende o 1 de xaneiro ó 31 de decembro, de cada día nace unha historia que atravesa as fronteiras do mapa e o tempo. “Son historias contadas coa menor cantidade de palabras, para contar a maior cantidade de cousas”, explica o autor desta obra na que viaxa dende Latinoamérica ata a antiga Babilonia, centrándose nos máis invisibles.

366 historias nas que Galeano capta instantáneas que reflexan a vida de homes e mulleres célebres ou anónimos. Feitos sorprendentes ou curiosos situados en diferentes épocas e lugares que amosan as fraxilidades de personaxes coñecidos e a grandeza dos ignorados.

O escritor, gañador do prestixioso premio “Stig Dagerman” en setembro de 2010, un dos máis prestixiosos galardóns literarios dos países nórdicos, é autor de obras tan coñecidas coma “Memoria do lume” (1986) e “As veas abertas de América Latina” (1971), traducidas a máis de 20 idiomas, abre unha nova etapa coa súa nova obra, trascendento os seus traballos anteriores que parten de xéneros ortodoxos combinando documental, ficción, periodismo, análise político e historia.