A xente miúda da casa e as súas familias serán os destinatarios desta nova acción impulsada desde a Consellería de Cultura e Educación para a Rede de Dinamización Lingüística

Santiago de Compostela e A Estrada foron os primeiros concellos en acollelos onte e hoxe será a quenda de Teo e mais de Ames

Compleméntanse con encontros dixitais, unha serie de animación na TVG2 e xogos e cancións descargables en internet, no marco dun ambicioso proxecto trasmedia

Santiago de Compostela, 28 de outubro de 2012.- A Consellería de Cultura, Educación e Ordenación Universitaria, por medio da Secretaría Xeral de Política Lingüística, botou a andar esta mesma fin de semana os Encontros teatrais dos Axóuxeres, no marco do programa de dinamización lingüística Os Axóuxeres, destinados aos máis pequenos do fogar e ás súas familias. A iniciativa nace coa finalidade de seguir promovendo o uso e a transmisión interxeracional do galego nas familias con bebés de cero a tres anos.

Os protagonistas do espectáculo son unha familia de bonecos de xoguete que viven encol dunha mesa. Xan, Iria e Pelouro, xunto co seu amigo marciano R01 –ou Roi para os pequenos-, cantarán e brincarán con todos os asistentes ao longo dunha hora de espectáculo, chea de sorpresas e diversión para toda a familia. Estes encontros viaxarán por unha vintena das localidades adheridas á Rede de Dinamización Lingüística (RDL) durante as fins de semana do outono.

O arranque do despregamento das actividades polas localidades da RDL tivo lugar onte en Santiago de Compostela e na Estrada. Hoxe chegarán a Ames e Teo.

A entrada é de balde, pero cómpre reservar praza no teléfono 637 179 304 dende unha semana antes da celebración. Para coñecer as experiencias das familias nestes Encontros teatrais, xa está aberto un espazo de participación en internet, na que aqueles asistentes que narren a súa vivencia entrarán no sorteo de 15 lotes de produtos de lecer para toda a familia: http://www.xunta.es/linguagalega/experiencia_encontros_axouxeres.

Proxecto trasmedia

A nova edición dos Axóuxeres, posta en marcha dende o departamento educativo da Xunta de Galicia, constitúe un ambicioso proxecto que inclúe, amais dos encontros teatrais, unha serie de televisión, 20 sesións de cinema interactivo para cativos de tres a seis anos e xogos e cancións para descargar ao ordenador, tableta ou teléfono móbil.

A colaboración entre a Compañía de Radio-Televisión de Galicia (CRTVG) e a Administración autonómica posibilita que os nenos e nenas galegas poidan gozar das peripecias dos Axóuxeres dende as súas casas, no espazo televisivo do mesmo nome que se emite no Xabarín Club dende o luns 22 de outubro. En cada episodio, a divertida familia de xoguete enredará cos nenos para que o pasen moi ben e, ao mesmo tempo, vaian aprendendo a falar. Os 39 capítulos de nove minutos poderanse ver na segunda canle da televisión pública de Galicia de luns a venres á mañá, ao mediodía e pola tarde.

Encontros dixitais

Para os cativos de tres a seis anos, Os Axóuxeres 2012 teñen reservado outro tipo de espectáculos. Os máis grandiños poderán gozar dunha sesión audiovisual interactiva na que vivirán unha nova aventura interactiva coa familia dos Axóuxeres. Dende o mes de novembro, poderase acudir a estas sesións noutra vintena de localidades nas que se radican outras tantas entidades adheridas á RDL.

Para complementar as actividades, xa está ao dispor dos pais e nais a versión descargable das cancións do programa, xogos e aplicacións para o móbil e tabletas Android. Todas as aplicacións, calendario e información, pódense consultar na web: www.xunta.es/linguagalega/os_axouxeres_2012.