· Comisarios: Iñaki Martínez Antelo e Agar Ledo Arias

· Produción: MARCO, Museo de Arte Contemporánea de Vigo

No ano 2006, o MARCO produciu unha das exposicións que máis eco tivo no ámbito galego: ‘Urbanitas’, unha mostra colectiva que presentaba o traballo de trinta artistas galegos nacidos a partir de 1970. Ademais desta característica en común, o eixe temático eran certas actitudes, visións e percepcións vinculadas a un contexto e espazo urbano. Tomando como punto de partida este precedente, o MARCO traballa nunha revisión do panorama da arte galega máis nova, da xeración que toma o relevo a aquela, coa vontade —e necesidade— de investigar e mostrar o que está a suceder nun tempo e lugar determinados, de asumir riscos, de encher certos baleiros na percepción, coñecemento e difusión da obra de artistas emerxentes.

Trátase un proxecto que insiste no aquí e agora, e cuxo principal compoñente será a inmediatez, tanto espacial como temporal. Con esta produción, tómase o pulso ao contexto máis próximo e a un momento no que se dan as condicións para que xurdan novas xeracións que empezan a desenvolver un traballo continuado dentro e fóra de Galicia. Máis alá de calquera intento de poñer orde mediante unha sucesión de traballos, a exposición formúlase dende unha perspectiva orgánica, onde uns conceptos levan a outros, propiciando a liberdade de asociación. A partir de aquí, ábrense multitude de perspectivas que se irán entrelazando ao longo da mostra, como puntos de encontro entre a arte e os seus procesos de creación ou transformación.

O título da exposición, ‘OS VERANEANTES’, alude a esa condición de reencontro que supón un proxecto circunscrito a un ámbito xeográfico concreto. Ademais, remítenos á peza teatral do mesmo nome que Maximo Gorki estreou en 1904, na que se transmitía a necesidade de cambio na sociedade rusa pre-revolucionaria, e onde os personaxes mostran como o ser humano adquire conciencia da súa capacidade para alterar o mundo que o rodea.