O acto terá lugar no salón de plenos da Casa do Concello de Pobra de Trives, coa intervención do presidente da Deputación de Ourense, Manuel Baltar; o alcalde de Trives, Francisco José Fernández Blanco, e o xerente do Inorde, José Manuel Rodríguez.

O estudo determina que coa promoción da Estación de Montaña de Cabeza de Manzaneda –dinamizadora da comarca- poderase potenciar o sector servizos, penalizado pola situación de crise actual, un sector que xunto co da agricultura/gandería e o comercio/hostalería son as actividades económicas principais da comarca da Terra de Trives.

O Observatorio Económico Ourensán é unha ferramenta de análise económica, laboral, empresarial e social que puxo en marcha a Deputación de Ourense para coñecer a situación da provincia de Ourense e das súas comarcas. Forma parte do Plan de estratexia operativa OURENSE 92, e nace da implicación entre institucións (Deputación e Inorde), universidade e empresa, e na súa elaboración intervén un equipo multidisciplinar de profesionais e universitarios especializados do Departamento de Economía Aplicada da Universidade de Vigo.

No estudo que esta tarde se presenta destaca o número de unidades locais (empresas e centros de traballo) que se incrementou na Terra de Trives nun 5,8% no período 2007-2011, segundo os últimos datos do IGE (Instituto Galego de Estatística). Un dato importante se se compara co incremento detectado nas comarcas de Verín (1,9%) e Ourense (1,1%) no mesmo período, e claramente destacado se se compara coa media da provincia de Ourense (-0,9%) e co total de Galicia, que apenas ten un incremento dun 0,3%.

Ademais, logra aumentar as unidades locais na totalidade dos seus concellos, sobresaíndo Chandrexa de Queixa (7,7%) e A Pobra de Trives (6,4%), aos que seguen San Xoán de Río (4,6%) e Manzaneda (4,1%). Desta maneira, a conclusión é que, a pesares da crise, aumentou o seu número de unidades locais na comparativa entre 2007 e 2011.

Mellora de afiliacións á Seguridade Social

No período 2011-2012 a comarca de Trives conseguiu mellorar o número de afiliacións a Seguridade Social, cunha perda de só o 2,70%, situándose entre as seis comarcas da provincia de Ourense que logran perder menos do 3% neste período, Viana (-1,2%), Ourense (-2,2), Terra de Caldelas (-2,4%), A Limia (-2,5%) e Allariz-Maceda (-2,6%). A baixada media no conxunto da provincia foi do 3%, a de Galicia aproximouse ao 3% (2,8%), e o total de España perdeu un 2,7%.

A comarca de Trives sitúase nunha posición mellor que a maioría das comarcas da provincia na variable laboral e económica que mide a evolución do paro rexistrado. Dende o comezo da crise presenta a cuarta menor subida do paro a nivel provincial, aínda que cun incremento acumulado do 34,1%. Só a Baixa Limia (9%), Terra de Celanova (20,7%) e Verín (23,5%) ofrecen mellores rexistros, e está por debaixo das medias da provincia de Ourense (43,8%) e de España (71,5%).

Se nos fixamos no período 2011-2012 a súa posición empeora considerablemente ao encontrarse como a segunda comarca da provincia de Ourense con maior incremento de paro (20,7%) a pouca distancia da comarca que peor resultado ofrece, Terra de Caldelas (20,8%). A máis curto espazo de tempo o incremento interanual do 20,7% está situado amplamente por riba da subida media da provincia de Ourense (11,2%), de Galicia (10,6%) e de España (10,8%).

Por municipios o mellor comportamento desde o inicio da crise corresponde a Pobra de Trives (24,3%), situándose os demais concellos por riba da media da provincia, sendo Xan Xoán de Río o que peor situación mostra (68,8%), aproximándose a media do 71,5% de España. Analizando o último ano, os catro concellos que forman parte da comarca de Trives teñen subidas interanuais por riba da media da provincia de Ourense (11,3%), Chandrexa de Queixa (38,9%), San Xoán de Río (22,7%), A Pobra de Trives (19,3%) e Manzaneda (18%).