Continúa o ciclo 'Material Memoria' no MARCO

Este venres e sábado, con dúas pezas escénicas de Rui Catalão

Dentro das palavras/Avenida dos bons amigos

Esta fin de semana continúa no Patio 1 da planta baixa do MARCO 'Material

Memoria', o programa de artes escénicas e cine comisariado por Pablo

Fidalgo Lareo dentro da exposición VERANEANTES. Nesta ocasión, con dúas

propostas escénicas do autor portugués Rui Catalão.

Rui Catalão

Dentro das palavras

Venres 29 de novembro, ás 19.30

Rui Catalão

Avenida dos bons amigos

Sábado 30 de novembro, ás 19.30

Patio 1 (planta baixa)

ENTRADA GRATUÍTA. Prazas limitadas ata completar aforo

"Os meses previos á estrea de Dentro das palavras foron meses de loucura,

sentimento de frustración, culpa, impotencia e fracaso. Hoxe sei que fixen

unha peza lixeira, feliz e delicada, certamente repleta de momentos

terribles, pero sempre nun ton luminoso e con bo humor, e nunha relación

calorosa e íntima co público. Montei Dentro das palavras coma se estivese

morto, ao mirar atrás, como nunha despedida. Maxicamente o pesadelo e a

pena fóronse disipando, dando lugar á graza e o encantamento. Xulgaba que

este o meu primeiro chan sería o meu último acto público. Ao tratarse dun

testamento, escondín o pánico, e sinto que mostrei, nos límites das miñas

capacidades, que as vivencias só merecen ser vividas se non nos deixamos

martirizar polo sufrimento.

A nosa memoria non serve só para lembrar o pasado ou preparar estratexias

para o futuro, é tamén un instrumento de repartición, no que se esboza un

sentido de pertenza. O sentido da vida pode non existir por si mesmo aínda,

pero sempre podemos inventalo. A única mentira da que me comprazo é a de

parecer que non teño medo. É preferible avanzar con medo, facendo crer que

non temos medo, que agochármonos, con medo a ter medo. Descubrín que vivía

abraiado por unha multitude de personaxes que se cruzaran comigo, e que eu,

ao desaparecer, estaría a participar tamén na súa desaparición. Con este

solo descubrín o xeito de facelos revivir, a través do meu corpo, dentro

das palabras. É un solo acompañado".

Rui Catalão

Usando a autobiografía, a historia recente dos lugares onde ten vivido, e

unha perspectiva antropolóxica para crear ficcións, o traballo de Rui

Catalão rolda as zonas de fronteira entre espazo privado e público, os

temas da memoria, do azar, da fraxilidade e da transparencia, e de como o

acto de contar historias altera a percepción dun corpo. É autor e

intérprete dos solos Av. Dos Bons Amigos (2013) e Dentro das palavras

(2010). En 2012 estreou Melodrama para 2 atores & um fantasma (con Cláudio

da Silva e Sofia Dinger) e Manifesto de Goya, ambos presentados no Teatro

Maria Matos.