A través de oito artistas que traballan coa fotografía, o vídeo e a instalación, a exposición ‘HISTORIA, MIRADAS DE ARTISTAS’ formula diversas miradas, diversos modos de aproximarse aos feitos históricos, tanto do presente coma do pasado. A todos eles os une o desexo de reflexionar sobre os devanditos acontecementos pero o fan dende unha postura distanciada, que ten máis que ver coa do artista ca coa do fotógrafo de prensa ou de reportaxe. A maioría destes artistas traballan con imaxes construídas —apelando a ese “facer imaxes” que sinala Hans Belting na súa Antropología de la imagen—, e con iso poñen en dúbida o carácter demostrativo ou indexal do medio fotográfico. No seu conxunto, as obras reunidas nesta exposición formulan cuestións sobre os diversos modos de representación da realidade e evidencian, de xeito sutil e distanciado, as pegadas, feridas e cicatrices deixadas pola historia.

Precisamente a pasada fin de semana, varias das actividades organizadas con motivo do DIM, Día Internacional do Museo, xiraron ao redor desta mostra, como a actuación do coro Obradoiro Vocal ‘A Vila’ nas propias salas, ou as visitas guiadas, que reuniron un bo número de visitantes.