O gospel encherá o luns 20 o auditorio do Pazo da Cultura da man do Alabama Gospel Choir, considerado como un dos embaixadores deste estilo musical en Estados Unidos con títulos tan coñecidos como "God is Moving", "I Am the Lord", "Your God" ou "Thank you". Cun variado repertorio, que abrangue desde a música barroca ata a música do século XX, o Alabama Gospel Choir fai un recorrido único polas raíces dun xénero que fusiona como ningún outro o visceral e o espiritual.

Formado por 30 artistas, este grupo vocal de Alabama está ligado historicamente ao coro Aeolians, unha institución fundada en 1896 e pertencente á Black Seven-Day Adventist, que promove o desenvolvemento harmonioso do corpo, a mente e o espírito. Nesta ocasión, o Alabama Gospel Choir contará coa participación especial de Johnny Sanders e Francine Murphy, entre outros destacados artistas internacionais como Merian Terry, E. Travis Jones, Dr. Kevin e a directora do coro Deana Butler.