Cantos na Maré, Festival Internacional da Lusofonía tende pontes entre os países lusófonos na súa oitava edición. O Pazo de Cultura de Pontevedra será o escenario ao que se subirán catro das voces máis persoais da música lusófona actual. O brasileiro Lenine, un dos músicos máis admirados da escena brasileira das últimas décadas, é unha das propostas máis destacadas dunha edición na que tamén participan Guadi Galego, co seu achegamento contemporáneo á música galega de raíz; o portugués António Zambujo, o último renovador do fado; e a angolana Aline Frazão, que será o gran descubrimento desta edición.

O espectáculo desenvolverase baixo a dirección artística de Uxía e a dirección musical de Paulo Borges. A banda de acompañamento mantén o seu carácter lusófono, integrada por músicos galegos, portugueses e brasileiros: Xacobe Martínez Antelo (Galicia, contrabaixo), Quiné (Portugal, batería e percusións), Rubén Santos (Portugal, trombón), Sérgio Tannus (Brasil, guitarra e cavaquinho) e Paulo Borges (Azores-Portugal, piano).