DI ELAS é unha banda de power-rock que puido ter nacido en 1993 tras "Los Contentos" de Piti Sanz e "Los Huana" de Luis Tosar. Non foi así, e durante eses anos Piti e Luis aínda compartirían outras experiencias con Goldi nos escenarios, baixo o nome de "Magical Brothers".

DI ELAS tamén podería ter nacido en 2005 cando Piti e Luis atopan a Iván Laxe dos "Skornabois", a Suso Alonso da "Psicofónica de Conxo", e a Ro Muñoz dos "Groovefathers", coñecidos músicos galegos e tamén vinculados ao audiovisual, pero tampouco era ese o tempo.

En 2008 todos eles agrúpanse baixo "The Ellas", interpretando en directo un repertorio con versións de grupos liderados por mulleres, construíndo un son propio como banda que os levará en 2010 a compoñer temas propios, agora si, tras o nome definitivo de DI ELAS.

O Pazo da Cultura de Pontevedra acolle este venres 15 ás 21 horas, o concerto de presentación en Galicia do seu disco debut homónimo, once temas cheos de enerxía e frescura que promete facer as delicias dos amantes da boa música e os directos contundenes.