Qué é o que se merenda nun "Picnic Extraterrestre?" A resposta tena Iván Ferreiro no seu novo disco, o terceiro en solitario que presenta no Pazo da Cultura de Pontevedra mañá sábado 2 ás 21.00 horas. E anque non é de Venus, senón de Vigo, os seus doce anos ao fronte de Los Piratas e algo máis dun lustro de sinuosa carreira en solitario, é suficiente aval para dar debida resposta a tal incógnita. E faino como mellor sabe, con cancións.

Editado en maio de 2010, Picnic Extraterrestre sorprendeu a público e crítica polos temas crúos pero fermosos, cheos de optimismo pero coa dureza lírica á que o artista nos ten acostumados. Trátase dunha obra penetrante, dominada tanto pola intensidade emocional como polos climas musicais e a que sobrevoa una certa sensación de catarse. Un disco nobre, co que este músico inquedo se afianza neste espazo que lle pertence por dereito, no que a mellor tradición pop -a da escola de cancións de tres minutos- se encontra sempre coa investigación, coa innovación constante.