O Auditorio do Pazo da Cultura acolle o concerto despedida de xira do aclamado grupo indie Love of Lesbian. Os barceloneses van presentar ao público pontevedrés os temas do seu último traballo discográfico "1999 (o cómo generar incendios de nieve con una lupa enfocando a la luna)". Este disco, o sexto da formación e o terceiro gravado en castelán, está plantexado coma unha película na que se narra a historia de amor e desamor de Marina e Carles.

Considerados por parte da crítica musical especializada como o grupo indie pop do ano, comezaron a súa carreira profesional en 1998. O seu primeiro disco, "Microscopic Movies", deulles daquela certa repercusión. Pouco despois foron escollidos polo líder dos The Cure, Robert Smith, para seren teloneiros da súa xira. Este feito proporcionoulles notoriedade a nivel nacional. Desde aquela gravaron 6 discos. Os dous primeiros integramente en inglés para, paulatinamente, iren integrando temas en castelán, ata este último traballo co que pechan xira en Pontevedra.