Sargadelos presenta a súa principal contribución ao centenario no nacemento de Luís Seoane: a nova xarra-testa do artista. Esta presentación levarase a cabo na inauguración dunha exposición que reúne por primeira vez as pezas de porcelana que creou para Sargadelos.

Luis Seoane foi unha peza central e esencial para a recuperación da histórica fábrica da Mariña luguesa que fundara Raimundo Ibáñez, Marqués de Sargadelos, en 1806. Ese soño fíxose realidade cando, en 1970, se inaugurou a nova planta circular de produción, e con ela principiou unha cultura empresarial e unha nova liña de deseño, radicalmente moderno e ao mesmo tempo enraizado nas orixes e as tradicións de Galicia.

As primeiras pezas figurativas que iba ter o novo Sargadelos están deseñadas por el, e a maior parte delas teñen como temas as tradicións e personaxes históricos de Galicia. As dúas primeiras están relacionadas co mítico santuario de San Andrés de Teixido, en Cedeira (A Coruña), no que se inspirou Seoane para facer un santo no que gardar auga, e máis unha pomba para a “herba de namorar” da que fala a lenda. O artista reinterpreta tamén figuras vexetais e animais, como a “Pomba pedra”, o “Gato pedra” ou a “Vaca con paxaro”, e un vangardista candelabro “Cinco Dedos”. Destacan nomeadamente, polo seu carácter innovador no seu tempo, as coleccións de “xerras-testas de personaxes históricos” deseñadas por Seoane nesa época: 19 xarras de personaxes da Galicia Medieval (de 11,8 cm de alto), e 10 personaxes senlleiros da cultura (de 26 cm): dende Rosalía a Castelao, de Picasso a Unamuno, ou de Machado a León Felipe, entre outros.