· Comisaria: Anna Cestelli Guidi

· Produción: Fondazione Musica per Roma, coa colaboración de Accademia Nazionale di Santa Cecilia e American Academy in Rome

Esq.: Nicholas Isherwood canta HUM, de Massimo Bartolini

En HUM, Massimo Bartolini fai uso dun dos elementos máis presentes no seu traballo: o son. A través da creación de dúas novas pezas sonoras baseadas na idea da gravación e adaptadas especificamente ás salas da primeira planta do MARCO, Bartolini transforma o espazo expositivo de forma sorprendente e inesperada, creando unha atmosfera de íntima beleza animada soamente pola presenza incorpórea da voz: unha voz sen corpo que, desprotexida do ego da presenza do artista, acha agora o seu último significado na presenza e na interpretación da audiencia. Nesta ocasión, as obras que se presentan están centradas nunha das máis brillantes e enigmáticas figuras da música dos últimos séculos, Glenn Gould, con ocasión da Homenaxe presentada pola Academia de Santa Cecilia en Roma, dentro das celebracións dedicadas ao artista cando se cumpren oitenta anos do seu nacemento (1932) e trinta da súa morte (1982).

Con esta exposición, o MARCO de Vigo dá un paso máis na súa liña de proxectos expositivos relacionados coa arte sonora e con artistas que traballan co son. Un interese que tivo o seu reflexo en propostas como ‘A mostra invisible’ (2006), ‘Escoitar.org’ (2007), ou ‘Loreto Martínez Troncoso’ (2011), ademais da presenza de obras sonoras en moitos outros proxectos e mostras colectivas de produción propia.