Trátase dunha adaptación ao noso contorno artístico, cultural e etnográfico do programa televisivo “Pekín expréss”. Unha mestura de xogo de cidade, xincana fotográfica, procura do tesouro e recuperación de xogos populares.

Os/as participantes deberán asistir en parellas e cunha cámara de fotos dixital para vivir a maior carreira realizada nunca na nosa cidade. Tres horas de xogo, cinco etapas e unha morea de curiosidades da cidade por descubrir. Santa María, a Moureira, a praza da Leña, as Cinco rúas e por último, a Ferrería, onde só unha parella acadará a vitoria. A cita é no Colexio Froebel ás 21h e haberá que inscribirse previamente, se tes entre 18 e 35 anos, chamando á Coordinación de Noites Abertas. 986840367, en horario de mañá

Pero o venres tamén no Froebel continúan os obradoiros de Abelorios Miyuki, Graffiti e Pintura Plakatstil e o Tenis de mesa libre. Mentres, no Local de Música a partir das 20h. terá lugar a inauguración da exposición e entrega de premios do 1º Certame de Erotismo Noites Abertas, nas modalidades de fotografía, relato e poesía. Finalmente, a programación para este venres complétase coa actividade de Judo e defensa persoal a partir das 21h. no Pavillón Municipal dos Deportes.

Para o sábado 7 de maio, a programación iníciase coas actividades ao aire libre. Así, ás 18h. cunha exhibición de graffiti, cos/as participantes do obradoiro do día anterior, nas pistas deportivas de Campolongo. Logo, a partir das 20h. na praza da Peregrina terá lugar a sesión de Bailes agarrados galegos, coa actuación do grupo Atalúns e organizado polos Chichisos.

A partir das 22h. a actividade de Noites Abertas vaise ao Local de Música coas Rock master class e onde tamén se pode acudir a ver a exposición das obras do 1º Certame de Erotismo; e tamén a partir desa hora, nos Campos de Herba sintética da Xunqueira terá lugar unha nova sesión de Fútbol-7, coordinado polo Club Deportivo CAFyD.