ROGELIO MARTÍNEZ DESTACA A APOSTA DO GOBERNO GALEGO POLO AFORRO E A EFICIENCIA ENERXÉTICA PARA REDUCIR OS CONSUMOS EN EMPRESAS E FOGARES

O delegado territorial da Xunta en Ourense presidiu o acto de apertura da VII Xornada sobre Enerxías Renovables e Eficiencia Enerxética que organiza Expourense

Esta actividade presenta experiencias internacionais de Alemaña, Suíza e Portugal

Ourense, 4 de setembro de 2013.- O delegado territorial da Xunta de Galicia en Ourense, Rogelio Martínez, presidiu esta mañá a apertura da VII Xornada sobre Enerxías Renovables e Eficiencia Enerxética. Trátase dunha iniciativa de Expourense que aposta pola difusión do uso de enerxías limpas e do aforro non só entre as empresas, senón tamén entre o consumidor final da enerxía. A rendibilidade de implantar estes sistemas non é so económica, senón medioambiental, polo que a súa aposta beneficia a toda a sociedade.

O delegado territorial sinalou que a Xunta de Galicia aposta pola promoción da eficiencia enerxética e as fontes renovables como un dos piares fundamentais para a redución dos consumos e a diminución das emisións de contaminantes á atmosfera. Neste contexto, referiuse ao novo programa de axudas a enerxías renovables, promovido pola Consellería de Economía e Industria a través do Inega, que conta este ano cunha partida de máis de 2 millóns de euros.

O novo programa de axudas impulsará 600 proxectos que xerarán un investimento asociado de 5 millóns de euros, evitando a emisión a atmosfera de preto de 5.200 toneladas de CO2 ao ano. O delegado territorial asegurou que esta actuación contribuirá ao aforro das empresas, institucións sen ánimo de lucro e familias e impulsará a competitividade do tecido empresarial.

A xornada, que conta co apoio do Igape, está orientada a profesionais e consumidores deste tipo de enerxías, e acolle experiencias internacionais no uso das fontes limpas. Alemaña, Suíza e Portugal serán os protagonistas desta edición que se complementa con charlas sobre o uso, iniciativas e investigacións desenvoltas en Galicia.

De xeito complementario a esta actividade existirá unha zona expositiva na que participarán importantes empresas relacionadas co sector radicadas en Galicia que presentarán os avances en instalacións e produtos relacionados coa xeotermia, a biomasa, a fotovoltaica ou a enxeñería ambiental.