‘OS AXÓUXERES’ CONTINÚAN A PRÓXIMA FIN DE SEMANA EN TEO E EN RIBEIRA, DA MAN DA CONSELLERÍA DE CULTURA E EDUCACIÓN

A nova edición do programa de dinamización lingüística enche de teatro, música en directo e monicreques 24 localidades de Galicia para promover o galego e a súa transmisión interxeracional

O prazo de inscrición, que é de balde ata completar a capacidade, xa está aberto para os encontros nas dúas localidades coruñesas

Santiago de Compostela, 4 de novembro de 2013.- A Consellería de Cultura, Educación e Ordenación Universitaria leva “Os Axóuxeres” a Teo e Ribeira a próxima fin de semana, no marco do seu itinerario por 24 concellos da Rede de Dinamización Lingüística (RDL) da Xunta de Galicia. O espectáculo teatral pensado especialmente para bebés e nenos menores de seis anos e mais para as súas familias incidirá nestas dúas localidades no uso e na transmisión interxeneracional do galego por medio do teatro, a música en directo e os monicreques.

Casas de moitos lugares

Cada Encontro dos Axóuxeres, de aproximadamente 35 minutos de duración, foi creado para ofrecerlles aos cativos un espazo onde desfrutar e abrirse ao descubrimento do mundo en galego. Na obra cóntanse historias adaptadas á xente miúda da casa, mesturadas con cancións especificamente creadas para a montaxe que implican directamente a participación do público.

O punto de partida é o descubrimento do mundo que nos rodea, tan característico da idade máis temperá. A partir da curiosidade por saber o que hai dentro dunha casa, e empregando o elemento sorpresa, fálase dos cambios que vivimos a diario na nosa vida e no noso contorno. Estes preséntanse como elementos positivos no desenvolvemento das persoas e das relacións entre elas. Preguntarse quen será ese novo veciño que é diferente a min e descubrir o seu mundo pode ser unha canle a novas experiencias e novas aprendizaxes de vida.

As casiñas da florista Hortensia, do equilibrista Telmo, do vello mariñeiro Antón ou de Marcelina e a súa gata Rita espertarán a curiosidade dos nenos por saber quen son os novos habitantes da aldea e, empregando o elemento sorpresa, irannos descubrindo os cambios que vivimos acotío na vida e no contorno. Para que o lecer en galego continúe na casa, as cinco composicións musicais que compoñen o espectáculo xa están dispoñibles en formato descargable na páxina web da Secretaría Xeral de Política Lingüística.

Reserva aberta para os encontros de Teo e Ribeira

Esta fin de semana, “Os Axóuxeres” fan parada en dous municipios coruñeses adheridos á RDL, Teo e Ribeira. No primeiro dos concellos poderase gozar a actividade o sábado, no Centro Sociocultural da Ramallosa, ás 18:30 horas, e, no segundo, o domingo, con outro pase no Auditorio Municipal ás 18:30 horas.

A participación nos encontros é de balde, con reserva previa ata completar a capacidade. As familias interesadas deberán inscribirse con antelación no teléfono 610 641 570, desde hoxe e ata o venres, en horario de 10:00 horas a 14:00 horas. Cada luns ábrese a inscrición correspondente aos pases de cada fin de semana, no horario sinalado.

Once encontros máis ata decembro

A sexta edición dos encontros dos Axóuxeres comezou a súa xira por concellos da RDL no mes de setembro e, completará, tras as sesións de Teo e Ribeira, o seu percorrido por 13 dos 24 concellos que contempla a súa itinerancia. Así, logo do seu paso por Ourense, Santa Comba, Arteixo, A Coruña, Ames, Burela, Viveiro, Ferrol, Xinzo de Limia, Verín, O Pereiro de Aguiar, Moaña, Redondela, Teo e Ribeira, “Os Axóuxeres” daranse cita en Vilalba, Mos, O Porriño, Pontedeume, O Grove, Vilagarcía de Arousa, Silleda, A Estrada e Santiago de Compostela ata o mes de decembro, para achegarlle o teatro, a música en directo e os monicreques á xente miúda da casa.