ROGELIO MARTÍNEZ INAUGURA O QUINTO SALÓN DO VIÑO E LICORES GALEGOS DE CALIDADE QUE SE CELEBRA EN EXPOURENSE

O delegado territorial da Xunta en Ourense destacou o peso do sector vinícola de calidade, que xerou o ano pasado máis de 153 millóns de euros

En total participan 66 expositores, nos que están presentes 38 adegas galegas

Esta edición de Vinis Terrae reunirá a importadores de 13 países, destacando o interese de empresarios dos Estados Unidos

Ourense, 27 de maio de 2013.- Durante dous días o recinto feiral de Expourense acolle a quinta edición de Vinis Terrae, Salón de Viños e Licores Galegos de Calidade. O delegado territorial da Xunta en Ourense, Rogelio Martínez, presidiu esta mañá o acto de inauguración do certame e incidiu na importancia do sector vinícola galego de calidade, que xerou o ano pasado máis de 153 millóns de euros.

Martínez destacou que Vinis Terrae se converte nun importante centro de negocios, “serve de ferramenta de internacionalización ao servizo das pequenas e medianas empresas galegas que producen viño de calidade para facilitarlle a exportación a mercados aos que, doutro xeito, lles resultaría máis complicado acceder”. O delegado territorial indicou que “nesta época cunha coxuntura económica complicada para as empresas, un posicionamento idóneo dos produtos para a súa comercialización no exterior amósase fundamental”.

Os Estados Unidos, con importadores procedentes de 27 estados, Reino Unido, Holanda, Brasil, Dinamarca e España son os países con maior representación nesta edición na que tamén participan compradores de Alemaña, Bélxica, Canadá, Francia, Suecia, México, Portugal e Perú.

O máximo representante da Xunta en Ourense subliñou que o sector vinícola “é un claro exemplo da excelencia dos nosos produtos agroalimentarios xa que o 95 % do viño producido en Galicia está amparado por unha denominación de calidade ou indicación xeográfica protexida, unha porcentaxe moi superior á doutras comunidades autónomas”.

Ademais, Martínez indicou que o labor de promoción que realiza este salón vai máis aló da comercialización, xa que “ofrece unha completa información sobre as nosas rutas enolóxicas que, a través do viño como fío conductor, servirán para promocionar a nosa gastronomía, patrimonio e natureza ante os asistentes ao certame, dinamizando así o noso turismo”.